Судскиот процес за катастрофалниот пожар во дискотеката „Пулс“ во Кочани продолжи со сведочења на две девојки, кои пред судот опишаа сериозни пропусти во работењето на локалот и хаосот што настанал кобната вечер.
Една од сведокот, Ана Томева, која преживеала во пожарот, изјавила дека објектот функционирал со бројни неправилности – од непријавени работници до недостиг на основни безбедносни стандарди. Таа посочила дека вработените немале обука за противпожарна заштита и дека не знаеле каде се наоѓаат противпожарните апарати, ниту како да постапат во итни ситуации.
Во нејзиниот исказ, прочитан во судницата, се наведува и дека дел од платите се исплаќале во готово, без официјална документација, а постоела и практика на прикривање на реалната состојба при најавени контроли.
Томева исто така изразила сомневање за влијание врз институциите, тврдејќи дека сопственикот имал неформална заштита од одредени лица во полицијата и инспекциските служби.
Втората сведок, Лина Крстева, која била присутна таа вечер, опишала паника и недостиг на организирана евакуација. Таа навела дека немало лица што ги упатувале гостите кон излезите, а дел од полицијата и присутните не реагирале навреме.
Според нејзиниот исказ, пожарот започнал за време на настап на музичка група, при што биле користени пиротехнички средства, по што брзо се проширил чад и избила паника.
По читањето на сведочењата, во судот биле презентирани и видеоматеријали од трагичниот настан, кои, според присутните, биле со вознемирувачка содржина.
