Истанбулската населба Шишли беше потресена од морничаво откритие: во контејнер за ѓубре беше пронајдено безживотно тело на жена, завиткано во чаршаф и без глава. Според истрагата, телото претходно било донесено во куфер и потоа фрлено во контејнерот.
Трупот го открил О.К., собирач на хартија, кој забележал дека чаршафот е премногу тежок за да биде нешто друго. Веднаш го пријавил случајот во полиција.
На местото на настанот пристигнале полициски и форензички екипи, кои утврдиле дека телото е на жена со отсечени делови, кои првично не биле пронајдени. Областа беше целосно обезбедена, а телото пренесено во Институтот за судска медицина. Со помош на отпечатоци од прсти, жртвата е идентификувана како Дурдона Хокимова, државјанка на Узбекистан.
Полицијата, преку преглед на стотици снимки од безбедносни камери, ги идентификувала осомничените: Д.А.У.Т. (31) и Г.А.К. (29), двајца државјани на Узбекистан, за кои првичните информации покажуваат дека мотивот бил љубомора, а еден од нив имал емотивна врска со жртвата.
По само осум часа интензивна потрага, осомничените биле уапсени на аеродромот во Истанбул, каде се обидувале да избегаат во Грузија. Трето лице, осомничено за помагање, исто така е приведено.
Запленет е куферот кој бил забележан кај осомничените и кој служел како доказ во истрагата.
Деталната истрага за ова брутално убиство продолжува.
