Српскиот претседател Александар Вучиќ изјави дека Србија останува на европскиот пат, но ја омаловажи неодамнешната посетa на делегацијата на Европскиот парламент (ЕП), нарекувајќи ги членовите „неважни луѓе“. Тој ја обвини проевропската опозиција дека работи против земјата, барајќи формирање на оперативен тим кој ќе ја координира европската интеграција.
Вучиќ истакна дека имал „поважни состаноци“ на Светскиот економски форум во Давос отколку разговорите со европратениците во Белград. Тој го критикуваше проевропскиот дел од опозицијата за „дрско и неодговорно однесување“, откако таа во разговор со делегацијата на ЕП побарала санкции против функционери вмешани во корупција, криминал и репресија врз демонстрантите и невладините организации.
Шефицата на делегацијата на ЕП, Марта Темидо, нагласи дека Европскиот парламент силно го поддржува членството на Србија во ЕУ и дека напредокот на европскиот пат бара почитување на демократските вредности, владеење на правото, основни права и спроведување на реформите. Таа додаде дека делегацијата добила загрижувачки извештаи за репресијата врз демонстрантите и академската заедница, и потенцира дека слободата на медиумите, изборните реформи и одговорноста се клучни за враќање на довербата на граѓаните.
Вучиќ побара формирање на помал оперативен тим за европската интеграција, кој ќе известува секојдневно за напредокот. Тимот, како што предложи претседателот, ќе го предводи амбасадорот во Брисел, Даниел Апостоловиќ, а ќе го сочинуваат министерот за европска интеграција Немања Старовиќ, министерот за правда Ненад Вујиќ, претседателката на парламентот Ана Брнабиќ и други функционери.
