Истражувачката репортерска лабораторија (ИРЛ) денеска јавно ги демантираше тврдењата поврзани со нивниот договор за соработка со Македонската радио телевизија (МРТВ), нарекувајќи ги „координирани напади и лажни информации“.
Во соопштението се наведува дека изминативе денови интернет порталите Плус Инфо, Лидер и Нетпрес, како и поврзани социјални платформи, дистрибуирале непрофесионални содржини со цел дискредитација на организацијата и нејзините новинари.
„Договорот со МРТВ не е таен и е потпишан во 2023 година, со важност до септември 2026. Тој е дел од неколкуте копродукциски договори што МРТВ ги има и со други организации,“ наведуваат од ИРЛ.
Организацијата ги отфрла тврдењата дека не доставила содржини или дека договорот е прекинат. „Нашата редакција тековно работи на преостанатите содржини, со детален план за објава,“ стои во демантот.
ИРЛ нагласува дека има 10 вработени, додека поврзаната фирма ИРЛ Стори Лаб има три, а дополнително се ангажираат и надворешни соработници. „Работиме согласно врвни меѓународни професионални и етички стандарди,“ додаваат тие.
Како непрофитна организација финансирана од грантови и донации, ИРЛ редовно комуницира со своите партнери. Според нив, нападите се дел од постојани обиди за дискредитација на истражувачкото новинарство и спречување на борбата против корупцијата.
Резултатите од нивната работа се веќе видливи – продуктите на ИРЛ емитувани преку МРТВ имаат освоено 11 домашни и меѓународни награди, меѓу кои и престижната „Global Shining Light Award 2023“, заедно со BBC.
