Во последното деноноќие, полициските служби регистрирале неколку случаи поврзани со семејно насилство и закани, при што три лица се лишени од слобода, а со уште четири се извршени службени разговори.
Во Скопје, на подрачјето на Кисела Вода, 22-годишен маж е лишен од слобода откако, според пријава, упатувал закани кон својот 64-годишен татко и при тоа користел нож. При преглед кај него бил пронајден нож и дробилка со остатоци од марихуана.
Во друг случај, 44-годишна жена од Скопје е лишена од слобода по пријава дека упатувала закани кон поранешниот сопруг и нивните деца, а кај неа била пронајдена бела прашкаста материја.
Во Охрид е извршен службен разговор со 46-годишен маж по пријава дека физички го нападнал својот малолетен син за време на викендите додека бил кај него согласно судска одлука.
Во Шуто Оризари, 42-годишна жена пријавила дека била физички нападната од својот брат, а во Драчево 76-годишен маж пријавил дека бил нападнат од својот син и ќерка. Во двата случаи полицијата спровела службени разговори со пријавените.
Во Гостиварско, исто така е лишено од слобода едно лице поради закани кон поранешна партнерка и нејзиното семејство.
Од МВР информираат дека сите случаи се во фаза на расчистување и по целосно документирање ќе следуваат соодветни пријави.
