Една од најшокантните приказни поврзани со нервниот агенс „Новичок“ повторно е во фокусот на јавноста, осум години по трагедијата што ја потресе Велика Британија. Чарли Раули верувал дека во контејнер пронашол скап француски парфем, но наместо подарок за својата девојка Дон Стерџес, несвесно ѝ предал смртоносен нервен отров.
Настанот се случил во јуни 2018 година во Ејмсбери, Англија. Раули ја пронашол кутијата со шишенце означено како парфем од познат бренд и решил да ја изненади својата партнерка. Таа го испрскала парфемот и само неколку моменти подоцна почнала да се жали на силна главоболка и нагло влошување на здравствената состојба.
Набргу изгубила свест, а и самиот Раули почнал да чувствува симптоми на труење. Подоцна било утврдено дека во шишето се наоѓал нервниот агенс „Новичок“, истиот отров што, според британските истражители, неколку месеци претходно бил употребен во обидот за труење на поранешниот двоен агент Сергеј Скрипал во Солсбери.
Дон Стерџес починала како последица од труењето, додека Раули поминал неколку недели во кома и долг период на лекување. По закрепнувањето, претрпел и мозочен удар, а последиците од труењето ги чувствува и денес.
Во неодамнешно интервју, Раули изјавил дека никогаш не можел да замисли дека обично шишенце парфем ќе стане дел од една од најпознатите меѓународни шпионски афери.
Случајот и денес останува еден од најпознатите инциденти поврзани со употребата на нервниот агенс „Новичок“, а повторно привлече внимание поради нов документарен филм во кој Раули зборува за трагедијата што засекогаш му го променила животот.
