Синоќа, Бенфика го совлада Атлетико Лис со 2-0 на гости во Купот на Португалија, но радоста од победата беше засенета од трагични вести. Еден од водачите на навивачката група на клубот, Серхио Каетано, беше пронајден мртов во автомобил недалеку од стадионот „Естадио да Луз“ во Лисабон, со прострелна рана во главата.
Португалскиот весник „Корејо де Мања“ јави дека покрај телото било пронајдено оружје, а полицијата добила пријава од случаен минувач. Семејството на Каетано претходно го пријавило за исчезнат ден претходно, по неговото утринско излегување за да го однесе синот на училиште.
Исто така, медиумите јавуваат дека уште еден член на истата навивачка група исчезнал пред два дена, што дополнително ја зголемува загриженоста за настаните околу оваа навивачка сцена. Трагедијата го засенува спортскиот успех и отвора сериозни прашања за безбедноста на навивачите.
