Тензична ситуација се развила во предградие на Киев, каде што група граѓани и роднини на војници се обиделе насилно да влезат во објект поврзан со украинската воена формација „Азов“, по обвинувања за незаконско задржување, физичко малтретирање и недозволување медицинска помош.
Според информациите што ги пренесува „Нетпрес“, повикувајќи се на извештај на руската државна медиумска мрежа РТ и украински медиуми, инцидентот се случил во Петропавливска Боршчахивка, во близина на украинската престолнина.
Очевидци тврделе дека во објектот биле задржувани десетици лица. На социјалните мрежи се појавиле снимки од судири пред портите и од повредени мажи кои биле изнесени од зградата.
Според изјавите на медицински персонал пренесени во извештајот, четворица мажи имале потреба од болничко лекување.
Се споменува и 14-годишно момче
Во медиумските извештаи се наведува дека меѓу лицата кои излегле од објектот имало и момче на возраст од 14 години.
Сепак, околностите под кои малолетникот се нашол таму, како и дали воопшто бил задржуван, не се потврдени.
„Азов“ ги негира обвинувањата за систематска тортура
Според доставениот текст, командантот на украинската Национална гарда, Александар Пивненко, изјавил дека станува збор за привремен центар за сместување и распределување мобилизирани војници.
Тој ги отфрлил обвинувањата за тортура, наведувајќи дека во објектот се формираат воени единици.
Формацијата „Азов“ потврдила поврзаност со објектот, но ги негирала тврдењата за систематско малтретирање и најавила мерки доколку се утврди незаконско насилство.
Буданов интервенирал, започната е кривична истрага
На местото пристигнал и Кирило Буданов, шеф на кабинетот на украинскиот претседател Володимир Зеленски, кој разговарал со присутните и повикал на смирување на ситуацијата.
Украинското Државно биро за истраги започнало кривична постапка за можна злоупотреба на службените овластувања. Ќе се испитуваат условите во кои престојувале војниците, можната примена на насилство и причините за нивните повреди.
Според украинскиот медиум „Хромадске“, 14-годишното момче му кажало на Буданов дека дошло на местото со пријатели. Буданов контактирал со неговата сестра за да организира да биде преземено од семејството. Нема потврдени докази дека момчето било затворено или мачено во објектот.
Засега не е утврдено дали во објектот навистина се вршела тортура, ниту како настанале повредите на четворицата војници.
