Единаесет деца загинаа, а уште 19 се повредени во голем пожар што избувнал во дом за сирачиња во Алжир.
Пожарот избувнал околу 3:30 часот наутро во двокатна зграда во Мохамедија, во источниот дел на главниот град Алжир, соопштија локалните власти.
Причината за пожарот засега не е позната. Не е соопштена возраста на загинатите и повредените деца, а според информациите нема загинати или повредени возрасни лица.
Спасувачките екипи успеале да евакуираат пет деца со проблеми во движењето, додека дел од повредените биле пренесени во специјализирана болница за лекување на изгореници.
Жителот Јасин Ибриз, кој живее во близина, раскажа дека слушнал врисоци и веднаш се упатил кон објектот за да помогне.
„Ги слушнавме криците и гласовите од запалениот дом. Пламените веќе го зафатија објектот, а девојчињата беа внатре. Истрчав без маица за да помогнам“, изјавил тој.
Ибриз успеал да спаси три девојчиња, но при акцијата се здобил со повреди на рамото, главата и карлицата.
Неговиот син Амир исто така се обидел да помогне, но поради густиот чад не успеал да влезе во зградата.
По гаснењето на пожарот, полицијата го обезбедувала објектот, а прозорците останале целосно изгорени и празни.
Алжирскиот претседател Абделмаџид Тебун изрази сочувство до семејствата на жртвите, нарекувајќи ја трагедијата голема загуба за земјата.
Пожарот се случил во период кога Алжир се соочува со силен топлотен бран. Според службите за цивилна заштита, во последните денови биле регистрирани речиси 1.000 пожари низ земјата.
