Во шокантен инцидент што се случи денеска во Германија, маж вооружен со секира нападнал патници во преполн воз, предизвикувајќи паника и повреди меѓу патниците. Нападот се случил кратко пред 14 часот во брзиот воз ICE 91, додека низ него патувале околу 500 лица.
Според информациите на полицијата, неколку патници ја повлекле рачната сопирачка, со што возот бил принуден да застане на отворена пруга. Тоа им овозможило на некои патници да го опколат напаѓачот, кој по инцидентот претрпел сериозни повреди и бил итно пренесен во болница со хеликоптер.
Иако официјално не е потврдено, се верува дека напаѓачот е од сириско потекло, што дополнително го вклучи вниманието на германската јавност и медиумите.
Железничката линија каде што се случил нападот е привремено затворена, додека на лице место се присутни бројни полициски и итни служби, кои им помагаат на повредените и ги обезбедуваат останатите патници.
Инцидентот веќе предизвикува силни реакции во јавноста, а властите најавија целосна истрага околу мотивите и околностите на нападот.
