Деветнаесетгодишно момче го загубило животот во трагична несреќа во Белград, откако, според неофицијалните информации, било погодено од силен струен удар во собата во која престојувало.
Несреќата се случила во објект на хотел за самци во белградската населба Раковица, а починатото момче е идентификувано со иницијалите А.Ч. (19).
Според информациите што ги објавува српски „Курир“, трагедијата се случила за само неколку секунди, по несреќен сплет на околности.
Момчето внесло кофа наполнета со вода во просторијата. Во еден момент се лизнало, ја изгубило рамнотежата и паднало на подот.
При падот, водата од кофата се истурила директно врз вклучена термоакумулациона печка.
Според неофицијалните сознанија, водата дошла во контакт со електричните инсталации на печката, што предизвикало силен струен удар со фатални последици.
Веднаш била повикана Итната медицинска помош, но лекарите по пристигнувањето можеле само да ја констатираат смртта на деветнаесетгодишникот.
На местото на несреќата пристигнале и полициски службеници, кои го обезбедиле просторот и извршиле увид за утврдување на сите околности.
За случајот биле известени надлежните служби, а телото на починатото момче ќе биде испратено на дополнителни анализи.
Точните околности на трагедијата треба да бидат утврдени преку надлежната постапка, додека првичните информации укажуваат на несреќен случај предизвикан од контакт на вода со електричен уред под напон.
