Иранските власти извршиле смртна казна над поранешен ММА борец, Голамреза Хани Шакараб, кој бил осуден за наводна шпионажа и соработка со израелските разузнавачки служби. Случајот предизвика силни реакции и нови обвинувања за нетранспарентни судски процеси во земјата.
Според официјалните ирански извори, Шакараб бил обвинет дека учествувал во мрежа која регрутирала лица за активности насочени против безбедноста на државата, како и за планирање на саботажи. Врховниот суд ја потврдил пресудата пред таа да биде извршена.
Поранешниот спортист потекнувал од градот Ардабил во северозападен Иран и бил активен во мешани боречки вештини (ММА), каде работел и како тренер и судија. Според организации за човекови права, извесен период живеел и надвор од Иран, а подоцна бил уапсен во 2025 година.
Човековите организации тврдат дека процесот бил спроведен без доволна транспарентност и дека на обвинетиот не му било дозволено слободно да избере одбрана. Исто така се наведува сомнеж дека признанијата можеби биле добиени под притисок.
Иранските власти не објавиле конкретни докази во јавноста, додека организациите за човекови права предупредуваат дека ваквите случаи и егзекуции се сè почести кога станува збор за обвиненија поврзани со Израел.
