Центарот на Солун синоќа беше сцена на интензивни судири меѓу полицијата и група маскирани лица, кои започнале напад пред Политехничкиот факултет на Универзитетот „Аристотел“.
Според локалните власти, во немирите еден полицаец се здобил со изгореници на главата и вратот, а хоспитализирана е и 21-годишна девојка поради вдишување на солзавец. Полицијата приведела над 300 лица, а повеќе паркирани возила во околината биле оштетени.
Инцидентите започнале околу 02:00 часот по полноќ, кога група лица излегла од факултетот и фрлала молотови коктели кон единицата за разбивање немири. Полицијата одговорила со зашеметувачки гранати, солзавец и водени топови.
Поради интервенцијата, главниот булевар „Егнатија“ беше затворен за сообраќај околу шест часа, предизвикувајќи големи застои и целосна парализа на центарот на градот до раните утрински часови.
Локалните власти најавуваат дека истрагата за настаните продолжува и дека ќе се преземат дополнителни мерки за обезбедување на јавниот ред.
