Српската полиција и жандармеријата доцна синоќа упаднаа во зградата на Ректоратот на Универзитетот во Нови Сад, придружувани од ректорот Дејан Мадиќ, за да растераат демонстранти кои таму се наоѓаа. Во зградата беа присутни студенти, професори, граѓани и медицински работници, кои беа спроведени во амфитеатарот, додека полицијата употреби солзавец, шок бомби и палки за да го растера протестот пред Филозофскиот факултет и Факултетот за спорт и физичко образование.
Претседателот Александар Вучиќ по интервенцијата истакна дека полицијата професионално ги извршила своите задачи, дека се уапсени неколку лица и дека се очекуваат уште апсења. Според него, повредени се 11 полицајци, а на протестите низ Србија присуствувале околу 9.380 лица, од кои 7.020 во Нови Сад.
Вучиќ ги нарече учесниците на протестите „европски олош“ кој дошол да ја наруши стабилноста на Србија и порача дека тие ќе бидат процесуирани според законите на земјата. Тој особено ги критикуваше претставниците на Европската зелена партија, кои според него помогнале во насилството.
Потпретседателот на Националното движење на Србија, Милош Павловиќ, истакна дека според Законот за високо образование, полицијата нема право да влегува во факултет без закана за безбедност, живот или имот. Од друга страна, опозициската потпретседателка Мариника Тепиќ и Партијата Србија Центар го осудија насилството, обвинувајќи го Вучиќ за злоупотреба на органите на редот и намерно заплашување на граѓаните и студентите.
Тие посочија дека интервенцијата била инсценирана и дека употребата на хемиски агенси и шок бомби претставува намерно труење и заплашување на населението, особено во контекст на неодамнешната трагедија на железничката станица во Нови Сад.
