По изборниот пораз на Александар Вучиќ и победата на Студентската листа, Србија се соочува со нова политичка неизвесност. Уредничката за надворешна политика на хрватската Нова ТВ, Ивана Петровиќ, смета дека земјата би можела повторно да излезе на избори во рок од шест месеци до една година по претседателските избори.
Според неа, Вучиќ и покрај поразот смета на една слабост на победничката листа – големите идеолошки разлики меѓу нејзините поддржувачи.
„Вучиќ игра покер со нив“
Петровиќ оцени дека Студентската листа обединила луѓе со различни политички убедувања, од монархисти и конзервативци до социјалисти и либерали.
„Тој веројатно смета дека нема да можат да се договорат околу заедничка политика и идеја“, изјави Петровиќ.
Таа нагласи дека високата излезност била пресудна за изборниот резултат, бидејќи студентите успеале да мобилизираат граѓани кои претходно не гласале, вклучително и повозрасни лица.
Сепак, предупреди дека од студентското движење можат да произлезат нови политички партии со препознатливи лидери и програми.
„80 отсто сум сигурна дека ќе има нови избори“
Петровиќ смета дека победниците ги очекува тежок период на формирање влада и преземање одговорност.
„80 отсто сум уверена дека по претседателските избори, за половина година до една година, Србија повторно ќе оди на избори“, изјави таа.
Како историска паралела го посочи периодот по соборувањето на Слободан Милошевиќ, кога меѓу лидерите на тогашната победничка коалиција се појавиле сериозни несогласувања.
Остра осуда за упадот во „Информер“
Петровиќ го осуди и упадот на демонстранти во редакцијата на провладиниот медиум „Информер“.
Иако остро го критикуваше уредникот Драган Ј. Вучиќевиќ, нагласи дека физичките напади и заканите се неприфатливи.
Според неа, новите политички сили мора да покажат дека навистина се залагаат за владеење на правото, а евентуалната одговорност на медиумите и нивните претставници треба да се утврдува преку надлежните институции.
Петровиќ заклучи дека промената на власта е само почеток, а вистинскиот предизвик ќе биде реформирањето на институциите и одржувањето на единството меѓу победниците.
