Снежното невреме и технички проблеми целосно го блокираа железничкиот сообраќај кон Далмација, оставајќи десетици патници заробени на железничката станица во Книн во исклучително тешки услови.
Станува збор за возот на релација Загреб – Сплит, кој тргнал во раните попладневни часови, но бил принудно запрен во Книн околу 21 часот. Според сведочењата на патниците, причината за застојот бил дефект на локомотивата, кој се случил непосредно пред пристигнувањето во градот.
Она што дополнително ја влошило ситуацијата е фактот што патниците со часови немале никакви официјални информации за тоа кога и како ќе продолжи патувањето. Тие тврдат дека биле оставени без храна, вода и организирана помош, додека надвор снежното невреме не стивнувало.
Иако во утринските часови пристигнал воз од правец на Сплит, патниците не биле префрлени со образложение дека продолжувањето на патувањето претставува безбедносен ризик поради лошите временски услови. Во меѓувреме, јавниот превоз во Книн не функционирал, а алтернативен транспорт воопшто не бил обезбеден.
Најголемото незадоволство, според патниците, произлегува од целосниот недостиг на координација и комуникација од надлежните служби. Нема организирани автобуси, нема замена за возот, ниту јасен план за решавање на кризата.
Додека снежното невреме продолжува да создава хаос низ Хрватска, патниците упатуваат итен апел институциите да реагираат, да обезбедат основни услови и навремени информации за луѓето кои веќе со часови се заглавени на пат.
