Црногорското Министерство за внатрешни работи понуди награда од вкупно милион евра за клучни информации што би донеле до лоцирање и апсење на еден од најбараните бегалци во регионот, воџата на „кавачкиот клан“ Радоје Звицер, и поранешниот полициски службеник Љубо Миловиќ.
За прецизни податоци кои директно ќе доведат до апсење на секој од нив поединечно, предвидена е награда од по 500.000 евра. Двајцата се со години во бегство и се на црвените потерници на Интерпол за тешки кривични дела.
Сериозни обвиненија и лажни идентитети
На товар на Радоје Звицер му се ставаат создавање криминална организација, тешки убиства и обиди за убиство, шверц на дрога, перење пари и недозволено држење оружје. Поради долгото бегство, странските полиции објавија и бројни лажни идентитети и туѓи пасоши кои ги користел (како Josip Babić, Dragan Gojković, Davor Lang, Željko Papić и други). Како посебна физичка карактеристика за негово препознавање се наведуваат и лузните од огнено оружје на левата страна од градите.
Љубо Миловиќ се бара за формирање криминална организација, помагање во обид за убиство, шверц на дрога, перење пари, предизвикување општа опасност и недозволено држење оружје и експлозивни материи.
Строги услови и безбеден начин на пријавување
За да се исплати наградата, информациите мора да исполнуваат три строги услови:
- Податоците мора да бидат точни, проверливи и директно да овозможат лоцирање и апсење.
- Мора непосредно да придонесат за полициските операции.
- Пријавата мора да има пресудно значење за успешно лишување од слобода.
Од МУП нагласуваат дека нема анонимни пријави преку социјални мрежи. Комуникацијата е строго институционализирана и се одвива преку директен и претходно најавен доверлив разговор со највисокиот врв на безбедносниот сектор, а идентитетот на лицата што ќе дадат информации е целосно заштитен.
Правото на парична награда е експлицитно ускратено за полициски службеници и нивни семејства, лица кои учествувале во извршувањето на овие дела, како и за лица кои ќе достават информации со кои полицијата веќе располага.
