Силно невреме проследено со обилни врнежи и силен ветер предизвика сериозни проблеми во повеќе делови на Полска. Од полноќ до денес полските пожарникари интервенирале повеќе од 4.000 пати, најчесто поради паднати дрвја, оштетени покриви и поплавени улици, објекти и подруми.
Поради опасноста од влошување на временските услови, превентивно биле евакуирани 12 извиднички кампови. Учесниците и персоналот биле префрлени во безбедни објекти, а засега нема информации за повредени.
Невремето предизвикало и проблеми со електроснабдувањето. Околу 19.400 домаќинства останале без електрична енергија, при што најпогодени се подрачјата околу Томашов Мазовјецки, Згеже и Пјотрков Трибуналски.
Поради тешките временски услови, полските Територијални одбранбени сили се ставени во зголемена готовност и им помагаат на локалните власти и службите на терен.
Обилните врнежи предизвикале и пораст на водостоите на реките. На некои места водата ги надминала предупредувачките прагови и се прелеала преку насипите, но надлежните служби информираат дека состојбата постепено се стабилизира.
Силниот ветер ги натерал властите да преземат дополнителни мерки. Во Варшава привремено се затворени градините на музејот Палатата Виланов, Кралскиот парк Лазиенки и зоолошката градина. Граѓаните се предупредени да избегнуваат престој под дрвја и на отворени места за време на најсилните налети.
Полскиот Институт за метеорологија и водостопанство издаде нови предупредувања за невреме и силен ветер во повеќе региони, што значи дека нестабилното време може да продолжи и во наредниот период.
