Албанскиот премиер Еди Рама повторно се најде во центарот на вниманието откако објави необично и провокативно видео изработено со помош на вештачка интелигенција, кое предизвика бурни реакции во јавноста и на социјалните мрежи.
Во време кога низ земјата се одржуваат масовни протести против контроверзен туристички проект вреден 1,4 милијарди долари, демонстрантите бараат негово итно стопирање и укинување на спорни законски решенија поврзани со инвестицијата. И покрај зголемените тензии, премиерот со своите последни потези дополнително ја разбранува ситуацијата.
Наместо смирување на состојбата, Рама, според критичарите, реагирал со провокативен пристап, обвинувајќи надворешни фактори за немирите и истовремено објавувајќи видео содржина генерирана со вештачка интелигенција, која веднаш стана вирална.
Во интервју за „Политико“, тој изјави дека Иран наводно е вклучен во „хибридна војна“ и дека шири дезинформации поврзани со проектот на компанија поврзана со Џаред Кушнер. Рама се осврна и на претходни сајбер напади врз Албанија, предупредувајќи дека земјата повторно може да биде цел на слични операции.
Објавата и изјавите предизвикаа поделени реакции, при што дел од јавноста ги смета за сериозно политичко предупредување, додека други ги оценуваат како дополнително наелектризирање на веќе чувствителната ситуација во земјата.
