Интерпол распиша црвена потерница по Украинката Анастасија Березовска, која се сомничи за учество во експлозија во Монако во која беа тешко повредени украинскиот бизнисмен Вадим Јермолаев, неговата партнерка и нивниот 13-годишен син.
Според истражните органи, постојат индиции дека осомничената по инцидентот го напуштила Монако и преку Франција се упатила кон Италија, при што не се исклучува можноста да стигнала и до територијата на Балканот.
Главниот обвинител на Монако, Стефан Тибо, потврди дека по Березовска е издаден налог за апсење и дека таа е ставена на црвена потерница на Интерпол. Тој нагласи дека осомничената се смета за потенцијално вооружена и опасна, како и дека постои сомнеж дека може да има помош од соучесници во бегството.
Според досегашните информации, по експлозијата таа наводно пеш ја преминала границата кон Франција и се упатила кон Бозолеј, по што истрагата претпоставува дека продолжила кон Италија. Како една од можните насоки на нејзиното движење се наведува и регионот на Балканот.
Инцидентот се случил пред луксузна зграда поврзана со Јермолаев, кој според медиумските извештаи бил цел на нападот. Првично истражителите сметале дека сторителот е маж, врз основа на безбедносни снимки, но подоцнежната истрага довела до нови сознанија и идентификација на Березовска како главна осомничена.
Правосудните органи во Монако и Франција водат истрага за обид за убиство, поставување експлозивна направа на јавно место и криминално здружување. Мотивот засега не е официјално потврден, но истрагата се насочува кон можни криминални пресметки.
Бизнисменот Јермолаев и претходно бил поврзуван со ризични деловни релации, а според извори блиски до него, бил под засилени безбедносни мерки. Повредената партнерка останува во тешка здравствена состојба, додека детето е надвор од животна опасност.
Полицијата апелира до јавноста за внимателност и предупредува дека осомничената не треба да се контактира доколку биде забележана.
