Голем потрес во косовското правосудство – обвинителот Беќи Шали од Основното обвинителство во Призрен е уапсен под сомнение за примање поткуп, потврдија официјално од Специјалното обвинителство на Косово. Апсењето било спроведено директно на неговото работно место, по претходна наредба од обвинителството и во координација со Дирекцијата за истрага на организиран криминал и сериозни кривични дела при косовската полиција.
Според информациите што ги пренесуваат косовските медиуми, истрагата против Шали траела подолг период, а сомнежите се однесуваат на примање мито во замена за олеснување на предмети што биле под негова надлежност. Засега не се објавени детали околу висината на примениот поткуп, но според неофицијални извори, сумата не била мала, што дополнително ја потресува јавноста.
Во официјалното соопштение на Специјалното обвинителство се наведува дека институциите „преземаат сите потребни истражни дејствија во согласност со Законот за кривична постапка и другите важечки закони“, со што се потврдува дека случајот се третира со високо ниво на сериозност.
Апсењето на обвинител во активна служба е редок и тежок удар за косовското правосудство, а јавноста бара целосна транспарентност и примерна санкција доколку се докаже вината. Овој случај повторно го отвора прашањето за корупцијата во судството и довербата на граѓаните во институциите кои треба да ја штитат правдата.
Не дознавај последен - читај ПРВ.мк
