Семејството на Ратко Младиќ, неговата одбрана и медицинскиот тим утре во Белград ќе одржат прес-конференција на која ќе зборуваат за околностите што, според нивните сознанија, ѝ претходеле на неговата смрт во притвор во Хаг.
Прес-конференцијата е закажана за петок, 4 септември, во 12 часот, во Прес-центарот на Здружението на новинари на Србија.
Пред јавноста ќе се обратат неговиот син Дарко Младиќ, адвокатот Драган Иветиќ, членот на медицинскиот тим на одбраната д-р Огњен Гудељ и министерот за правда Ненад Вујиќ.
Организаторите најавуваат дека ќе бидат презентирани информации со кои располагаат семејството, одбраната и медицинскиот тим за периодот што ѝ претходел на смртта на Младиќ.
„Во околности кои бараат најголема сериозност и одговорност, семејството, одбраната и медицинскиот тим остануваат посветени јавноста да биде запознаена со фактите, со почитување на достоинството на починатиот и правото на семејството да ја дознае вистината за сите околности на неговата смрт“, се наведува во најавата за прес-конференцијата.
На средбата со медиумите се очекува да бидат соопштени и детали поврзани со последното испраќање и погребот.
Телото на Младиќ беше пренесено во Воено-медицинската академија во Белград, откако со авион на Владата на Србија беше донесено од Хаг на белградскиот аеродром „Никола Тесла“.
Ратко Младиќ беше поранешен командант на Војската на Република Српска и беше правосилно осуден на доживотен затвор од Хашкиот трибунал за геноцид во Сребреница, злосторства против човештвото и воени злосторства.
