Холандските власти отворија истрага за смртта на Ратко Младиќ, поранешниот командант на Војската на Република Српска, кој почина во четвртокот за време на болничко лекување во Хаг. Посебна истрага за околностите на неговата смрт нареди и претседателката на Меѓународниот резидуален механизам за кривични трибунали.
Во исто време, Милорад Додик излезе со тврдење дека смртта на Младиќ претставува своевидно „убиство“. Според него, Младиќ можел да живее подолго доколку му била обезбедена подобра медицинска грижа, а постапувањето на Механизмот го оцени како нехумано. За ваквите тврдења Додик не приложи медицински докази.
Официјалните медицински документи од Хаг, објавени непосредно пред смртта на Младиќ, сепак прикажуваат поинаква состојба.
Во извештајот од 13 август било наведено дека неговата здравствена состојба брзо се влошува и дека влегол во последната фаза од животот, при што лекарите процениле дека смртта може да настапи во секој момент.
Лекувањето во тој период било насочено кон палијативна грижа, односно ублажување на болката и страдањето.
Во одлуката од 20 август било наведено и дека одбраната на Младиќ не тврдела дека медицинската грижа во Хаг е несоодветна, ниту дека во Србија би му било овозможено подобро лекување. Според независен медицински извештај, самиот Младиќ изјавил дека е „многу задоволен“ од лекарите и медицинскиот персонал.
Неговото барање за предвремено ослободување и префрлање во Србија било одбиено. Како образложение било наведено дека во затворската болница му биле обезбедени постојан медицински надзор, палијативна нега и поголеми можности за посети од семејството.
Од петте консултирани судии, двајца биле за негово ослободување поради тешката здравствена состојба и проценката дека смртта е близу, додека тројца се изјасниле против.
Претседателката на Механизмот, Грасиела Гати Сантана, го назначила судијата Ијан Бономи да ги испита околностите околу смртта.
Важно е дека отворањето ваква истрага е предвидена постапка кога лице ќе почине во притвор и само по себе не претставува доказ или потврда за тврдењето на Додик дека Младиќ бил „убиен“.
Ратко Младиќ издржуваше доживотна затворска казна откако беше правосилно осуден за геноцидот во Сребреница, злосторства против човештвото и воени злосторства извршени за време на војната во Босна и Херцеговина. Пресудата против него стана правосилна во 2021 година.
