Нова сериозна опасност се појави во деловите на Непал погодени од катастрофалните поплави. Езеро формирано од огромните количества наноси и одрони во близина на границата со Тибет почнало да се прелева, поради што жителите од ризичните области се упатиле кон повисоки и побезбедни места.
Непалската армија привремено ги запрела спасувачките операции, вклучително и хеликоптерските летови, откако биле добиени информации дека водата почнала да го надминува природниот бедем што го задржува езерото.
Очевидец на Ројтерс забележал жители во округот Расува како се упатуваат кон ридовите поради страв дека може да следува уште еден силен поплавен бран.
Езерото се формирало по огромните одрони што го погодија пограничниот регион меѓу Непал и кинески Тибет. Според последните информации, во него има повеќе од 2,5 милиони кубни метри вода.
Властите внимателно ја следат состојбата бидејќи евентуално нагло попуштање на природната брана би можело повторно да ги загрози населените места, патиштата и останатата инфраструктура низводно.
Во меѓувреме, бројот на загинати во катастрофата во Непал достигна најмалку 469 лица, додека голем број луѓе сè уште се водат како исчезнати. Според објавените информации, на непалската и тибетската страна вкупно се трага по речиси 1.000 лица, меѓу кои има и повеќе од 500 странски државјани.
Првичните анализи укажуваат дека катастрофата била предизвикана од масивен колапс на глечер. Огромна количина мраз, карпи и земја се урнала во речниот систем, создавајќи разорен пороен бран.
Водата, калта и камењата зад себе оставиле огромни штети – уништени се населени места, патишта, мостови, енергетска инфраструктура и објекти во близина на важниот граничен премин меѓу Непал и Тибет.
Дополнителна загриженост предизвикуваат и најавените нови врнежи. Властите предупредуваат дека нестабилните природни брани и големите количества нанос можат да предизвикаат нови поплави и одрони.
Поради тоа, населението во најризичните области е повикано да остане на повисоки и безбедни места додека опасноста не помине.
