Мост над реката Тротус во округот Бакау, Романија, бил сериозно оштетен и делумно се урнал во средата наутро, откако преку него поминало тешко возило.
Инцидентот се случил во селото Кобанус, кое се наоѓа во состав на општината Асау. Според првичните информации од надлежните, тешкото возило немало соодветна дозвола за движење по тој дел од патот.
Поради оштетувањето на мостот, целосно бил прекинат сообраќајот на државниот пат кој ги поврзува Бакау и Миеркуреа-Куч. Возилата биле пренасочени по алтернативни сообраќајници.
Од Инспекторатот за вонредни ситуации на округот Бакау (ISU) информирале дека нивни екипи биле повикани на местото по пријавата за оштетување на железниот мост.
„Пожарникарите од Бакау беа повикани да интервенираат во селото Кобанус, во општината Асау, по инцидент во кој беше оштетен железен мост. Нема повредени“, соопштија од ISU.
За да се овозможи движењето на возилата и да се избегне дополнителен ризик, бил воспоставен заобиколен правец. Сообраќајот во областа во моментот го регулирале полициски службеници.
Од ISU Бакау дополнително навеле дека на терен требало да пристигне и специјализирана група за техничка поддршка, чија задача е да ја процени состојбата на мостот и да ги утврди потребните мерки.
Случајот треба да биде разгледан и од Окружниот комитет за вонредни состојби, кој бил итно свикан со цел да се преземат чекори за нормализирање на сообраќајот.
Во меѓувреме, во реонот била распоредена и екипа на итната медицинска помош, како превентивна мерка за да нема застој во обезбедувањето медицинска помош доколку се појави потреба.
