Албанската Влада го одобри Националниот план за непредвидени ситуации за миграциски текови за периодот 2026-2028 година, стратешки документ кој има за цел да ги подготви институциите да се справат со зголемениот прилив на мигранти. Одлуката е донесена врз основа на член 100 од Уставот, по предлог на министерот за внатрешни работи, а нејзиното спроведување е доверено на Министерството за внатрешни работи, Министерството за здравство, Министерството за образование, структурите за цивилни вонредни состојби и други државни институции.
Прифатните центри нема да бидат концентрирани на едно место, туку ќе бидат распределени според миграциските текови и главните премини. Главниот фокус е на југоисточните и јужните гранични региони, особено во Корча, Ѓирокастро и Валона. Центрите ќе бидат наменети за мигранти од Авганистан, Пакистан, Иран, Сирија, Либан и Газа, кои Албанија и Србија ги користат како транзитна рута кон Грција.
Целта на планот е да ги подготви централните и локалните институции за успешно справување со кризата на мешаните миграциски текови, кои се очекува да се зголемуваат. Планот предвидува обезбедување на основни потреби на мигрантите, вклучувајќи сместување, храна, здравствена заштита, итни услуги и психосоцијална поддршка.
Албанија, како земја на Балканската миграциска рута која ги поврзува Турција, Грција, Албанија, Србија и Централна Европа, ја следи националната имиграциска политика за управување со миграциските текови и гарантирање на правата на мигрантите. Конфликтите на Блискиот Исток, нестабилната безбедносна ситуација во Авганистан и кризите во повеќе земји во Азија и Африка значително го зголемиле бројот на мигранти што ја користат оваа рута.
Во Албанија веќе постојат прифатен центар во Лежа, во пристанишниот град Шнѓин, и сместувачки камп во Ѓадр, кои беа изградени во соработка со Италија, но не профункционираа поради одлуки на судот во Рим. Сепак, италијанската премиерка Џорџа Мелони најави дека наскоро ќе бидат активирани.
