Првиот основен суд во Белград одреди притвор до 30 дена за девет сегашни и поранешни припадници на Единицата за обезбедување одредени личности и објекти (ЈЗО) при српското Министерство за внатрешни работи (МУП). Тие се осомничени за малтретирање и тортура врз студенти и други граѓани, кои по протестите во август минатата година биле однесени во гаражата на Владата на Србија.
Осомничените пред два дена, по барање на Првото основно јавно обвинителство, биле задржани во полициски притвор во траење од 48 часа. Меѓу нив се Игор Жмириќ, командант на Специјалната антитерористичка единица (САЈ), и Милан Вуковиќ, познат под прекарот „Бака“. Вуковиќ е пензиониран припадник на ЈЗО, а во моментов ја извршува функцијата вршител на должноста директор на притворската единица во која е сместен Марко Кричак.
Името на Кричак неодамна се најде во јавноста по неговото апсење во врска со случајот со убиството во белградската населба Сењак. Сепак, студентите го поврзаа и со инцидентот во гаражата на Владата на Србија од август минатата година. Студентката Николина Синѓелиќ јавно проговори за случувањата, тврдејќи дека Кричак ѝ се заканувал и со силување.
Судијата за претходна постапка при Првиот основен суд во Белград денеска донел одлука за одредување притвор до 30 дена за деветте осомничени, идентификувани со иницијалите В.Л., Ј.О., Б.Ј., Д.В., Н.Д., Н.Ф., З.В., И.Ж. и М.В.
Како што соопштил судот, мерката е определена врз основа на член 211, став 1, точки 2 и 4 од Законот за кривична постапка. Една од причините е постоењето посебни околности што укажуваат на можност осомничените, доколку останат на слобода, да влијаат врз сведоците и на тој начин да ја попречат кривичната постапка.
Дополнително, постои основано сомневање дека сториле кривично дело со елементи на насилно однесување, за кое е предвидена затворска казна подолга од пет години. Според образложението, начинот на кој наводно било извршено делото и тежината на последиците предизвикале вознемиреност кај јавноста, што би можело да го загрози непреченото и правично водење на постапката.
Против решението за притвор осомничените имаат право на жалба до Кривичниот совет за претходна постапка при Првиот основен суд, во рок од три дена.
Според информациите од Обвинителството, спорниот настан се случил на 14 август, во периодот од 22:30 до 01:00 часот, во гаражата на Владата на Србија. Осомничените, постапувајќи во својство на службени лица, наводно употребиле сила и закани врз студентите и другите граѓани со цел да изнудат информации, да ги заплашат и незаконски да ги казнат, нанесувајќи им тешка болка и страдање.
По сослушувањето на осомничените, обвинителот побарал да им биде одреден притвор, наведувајќи дека постои опасност тие да влијаат врз оштетените и другите сведоци на настанот, како и врз лица кои би можеле да ги кријат сторителите.
Обвинителството посочило и дека постои можност осомничените да ја попречат истрагата преку уништување, прикривање, менување или фалсификување докази и траги поврзани со кривичното дело.
Дополнителна причина за барањето притвор е фактот што осуммина од осомничените сè уште се вработени како службени лица во Министерството за внатрешни работи, додека деветтиот работи во Управата за извршување на кривични санкции. Според обвинителот, постојат основи за сомневање дека поради своите службени позиции тие би можеле во краток период да го повторат делото за кое се товарат.
Од Обвинителството најавиле дека истрагата продолжува. Во наредниот период треба да биде сослушан и осомничениот Кричак, а ќе бидат испитани и оштетените, кои во постапката се јавуваат и како сведоци. Ќе се прибираат и дополнителни докази и информации за целосно утврдување на фактите, по што ќе биде донесена одлука за следните чекори.
Случајот е дополнително поврзан со неодамнешното апсење на Марко Кричак и Бошко Секуловиќ, началник на Службата за сузбивање на криминал. Како што во неделата соопшти Вишото јавно обвинителство, двајцата биле лишени од слобода поради сомневање дека во периодот од 12 мај до 3 јуни 2026 година, додека извршувале службени функции во српското МВР, ги пречекориле и злоупотребиле своите овластувања, како и дека не ги извршиле службените должности.
Според обвинителството, со нивните постапки му била нанесена штета и биле сериозно повредени правата на оштетениот Веселин Милиќ, поранешен началник на Полициската управа за град Белград. Сомневањата се однесуваат на постапувањето во предметот за убиството на Александар Нешовиќ, кое се случило на 12 мај 2026 година во ресторанот „27“ во белградската населба Сењак.
Во соопштението на Вишото јавно обвинителство се наведува и дека постојат основи за сомневање оти на 16 мај 2026 година Кричак, заедно со други засега неидентификувани полициски службеници, го малтретирал и мачел оштетениот Н.Л., сопственик на ресторанот „27“ во Сењак. Наводниот инцидент се случил во просториите на Управата за криминалистичка полиција (УКП).
