Драматична ноќ зад себе оставија жителите на една област во Албанија, откако голем пожар зафатил куќи и објекти, а силниот ветер дополнително го разгорел огнот и овозможил пламените јазици брзо да се шират.
Според информациите од службите за итни случаи, досега целосно се уништени шест куќи. Три од нив биле населени, додека останатите три биле празни. Иако материјалната штета е голема, според првичните информации нема повредени лица.
Жителите сведочат дека ноќта била исклучително тешка. Како што огнот се приближувал и се ширел, дел од жителите, но и туристи кои престојувале во областа, биле принудени да ги напуштат своите домови и сместувачки објекти и да побараат безбедно место.
Сопствениците на локалните бизниси и туристичките работници велат дека пожарот ги затекнал неподготвени. Силниот ветер придонел огнот за кратко време да се прошири на голема површина, создавајќи дополнителна опасност за луѓето и имотот.
Ситуацијата останала сериозна и во раните утрински часови. Околу 2 часот по полноќ избувнал пожар и во уште една куќа, што дополнително ја зголемило паниката кај семејствата кои живеат во погодената област.
Пожарникарите продолжиле со интензивни напори да ги стават огнените фронтови под контрола и да го локализираат пожарот, додека големата материјална штета веќе е евидентна.
Утрово била активирана и воздушна операција. Хеликоптери започнале да истураат вода врз критичните делови од пожарот, додека на терен биле распоредени и припадници на вооружените сили. Во гаснењето учествуваат и голем број пожарникари пристигнати од различни градови во Албанија.
Во меѓувреме, пожар избувнал и во областа Фиер, каде што огнот брзо се проширил кон Леван, Пештан и Вогел. Пламените јазици зафатиле маслинови насади, борови шуми, ниска вегетација и објекти.
Поради опасноста огнот да се приближи до населените места, според првичните медиумски информации, околу 15 семејства биле евакуирани. Надлежните продолжуваат да ја следат ситуацијата и да интервенираат на местата каде што постои опасност пожарот дополнително да се прошири.
ИЗВОР: СЛОБОДЕН ПЕЧАТ.
