Бугарските пациенти плаќаат едни од најниските регулирани цени за лекови во Европската Унија, покажува најновата анализа на Health Metrics, објавува ВЕСТИМАК.мк.
Една од главните причини е силната конкуренција на фармацевтскиот пазар. Според анализата, кога за одреден лек ќе се појават шест или повеќе производители, неговата цена може да се намали за дури 60 проценти. Спротивно, повлекувањето на производ од пазарот во просек ја зголемува цената за околу седум проценти.
Важна улога има и системот на референтно ценообразување. Цените на регулираните лекови во Бугарија се споредуваат со оние во 17 земји од ЕУ, а надлежните институции редовно ги ажурираат вредностите земајќи ја предвид најниската референтна цена.
Овој систем, сепак, има и друга страна. Во последните три и пол години повеќе од 900 производи биле повлечени од листите, што отвора прашања за нивната достапност.
Податоците покажуваат интересен тренд: додека општото ниво на цените во Бугарија во истиот период пораснало за околу 14 проценти, лековите што ги покрива здравствената каса поевтиниле. Кај терапиите за домашно лекување падот достигнува до 12 проценти, а кај болничките препарати до 14 проценти.
Според пресметките, доколку цените останеле на нивото од 2023 година, бугарската здравствена каса би трошела околу 210 милиони евра повеќе годишно за истиот обем на лекување.
Сепак, вкупните расходи за лекови продолжуваат да растат, пред сè поради онколошките терапии. Трошоците за болнички онколошки лекови пораснале за 42,5 проценти меѓу 2023 и 2025 година, иако цената по единица третман се намалила за 19 проценти.
