Две големи меѓународни заплени на кокаин повторно го ставија Балканот, а особено Србија, под лупата на истражителите кои се обидуваат да ги откријат каналите на организираниот криминал.
Станува збор за огромни количини кокаин откриени во Либерија и Италија, а вниманието на јавноста го привлече фактот што во двата случаи се појавија одредени врски со Србија.
Во најголемата заплена во историјата на Либерија, товарот со кокаин бил проценет на околу 370 милиони долари, а меѓу уапсените лица се нашол и српски државјанин.
Дополнително, во италијанското пристаниште Вадо Лигуре бил откриен голем товар од околу 770 килограми кокаин, скриен во пратка банани пристигната од Еквадор. Меѓу пакетите со дрога биле пронајдени и оние со ознаки на српското знаме.
Италијанските царински и полициски служби откриле 650 пакети со кокаин со исклучително висок степен на чистота, а ова била втора голема заплена за краток период на истото пристаниште.
Сепак, експертите предупредуваат дека самото појавување на српско знаме на пакетите не значи автоматски дека дрогата била наменета за српскиот пазар или дека зад транспортот стојат криминални групи од Србија.
„Ознаката не е доказ за потеклото на криминалната мрежа. Дали постои поврзаност со Србија може да покаже само понатамошната истрага“, посочи Саша Ѓорѓевиќ од Глобалната иницијатива против транснационалниот организиран криминал.
Истражителите веќе подолго време укажуваат дека балканските криминални групи се меѓу значајните играчи во меѓународниот транспорт на кокаин кон пазарите во Западна Европа и Австралија.
Според експертите, шверцерските рути често воопшто не минуваат низ Србија или другите балкански земји. Дрогата директно се транспортира од Латинска Америка до големите европски пристаништа, додека лицата поврзани со криминалните структури можат да бидат базирани во различни држави.
„Србија во такви случаи може да се појавува како место на живеење или локација од која криминалците комуницираат со своите соработници, без самиот товар физички да поминува низ земјата“, објаснува Ѓорѓевиќ.
Случаите повторно ги отворија и прашањата за можната корупција и евентуалната вмешаност на поединци од институциите, бидејќи експертите сметаат дека големите криминални мрежи тешко можат да функционираат без одредени форми на помош.
Во јавноста повторно се споменуваат и пораки од платформата Скај, во кои се појавиле тврдења за можни врски со поединци и институции во регионот. Сепак, таквите наводи бараат дополнителни проверки и официјални докази.
Истражителите продолжуваат да ги следат меѓународните канали за шверц на кокаин, а последните заплени покажуваат дека трговијата со дрога и понатаму останува еден од најголемите предизвици за безбедносните служби во Европа.
