Силно невреме придружено со пороен дожд, град и силен ветер зафати делови од северна Словенија, предизвикувајќи поплави, материјална штета и проблеми со снабдувањето со електрична енергија. Најтешко погоден е регионот Корошка, каде временските непогоди за кратко време создадоа сериозни проблеми за жителите.
Поради влошените временски услови, Словенечката агенција за животна средина (АРСО) издаде портокалово предупредување за речиси целата држава, со исклучок на југозападниот дел. Надлежните институции апелираа до граѓаните да бидат особено внимателни, да избегнуваат непотребно движење на отворено, да останат во затворени простории кога е можно и редовно да ги следат официјалните временски известувања.
Најголеми последици се забележани во Корошка, каде паднал град со големина до околу 5 сантиметри, кој предизвикал значителни оштетувања на покриви, возила, земјоделски површини и друга инфраструктура. Особено погодени биле местата Равне на Корошкем, Котеље, Словењ Градец и долината Меžица, каде локалните медиуми известуваат за сериозни последици од краткотрајното, но исклучително интензивно невреме.
Обилните врнежи довеле до поплавување на повеќе патишта, а на неколку локации дошло и до прекин во снабдувањето со електрична енергија. Поројните води создадоа дополнителни потешкотии за жителите и службите кои беа мобилизирани веднаш по невремето.
Пожарникарските екипи интервенирале на повеќе места поради поплавени подруми, излевање на потоци и затнати одводни канали. Во Преваље биле ангажирани во испумпување вода од станбен објект, додека во Подгорје кај Словењ Градец со брза реакција успеале да спречат дополнително излевање на водата и поголеми штети.
Во Дравоград, надојден поток се излеал на локален пат и се заканил да поплави станбена куќа. Благодарение на навремената интервенција на надлежните служби, биле поставени заштитни бариери со кои било спречено навлегување на водата во објектот.
Надлежните служби и понатаму ја следат состојбата на терен, а граѓаните се повикани да останат претпазливи бидејќи временските услови сè уште се нестабилни и постои можност за нови интензивни врнежи и локални невремиња.
