Трагичен инцидент се случил на Триглав, највисокиот врв на Јулиските Алпи во Словенија, каде животот го загубил 19-годишен планинар.
Несреќата се случила во утринските часови, додека младиот планинар се враќал од планинарскиот дом Кредарица кон долината Врат.
Според информациите за случајот, на почетокот од патеката Томишек тој се лизнал и паднал во провалија. Поради сериозноста на повредите, 19-годишникот починал на местото на несреќата.
На терен веднаш биле испратени спасувачки екипи, а во акцијата бил вклучен и воен хеликоптер. Со него било пренесено телото на загинатиот планинар, по што хеликоптерот повторно се вратил на планината за да ги преземе останатите планинари кои биле со него.
На местото на трагичниот настан пристигнала и екипа на Хеликоптерската планинска спасувачка служба на Словенија од Брник. Во увидот учествувал и полициски службеник од планинската полициска единица.
Во спасувачката акција биле ангажирани и планински спасувачи од ГРС Мојстрана.
Несреќата повторно ја покажа опасноста од движењето по високопланински терени, каде и кратко лизгање може да има сериозни последици.
