Двајца српски државјани биле нападнати во Дубровник, откако повеќемина напаѓачи со палки оштетиле луксузен „Мерцедес“ со српски регистарски таблички. Инцидентот се случил во населбата Лапад, рано наутро, нешто пред 2 часот.
Според досегашните информации, нападнатите се наоѓале во автомобил со регистарски таблички од Зрењанин кога биле пресретнати од група напаѓачи. Тие почнале да го оштетуваат возилото со палки, по што двајцата српски државјани се обиделе да побегнат. При бегството биле нападнати и се здобиле со полесни телесни повреди.
Од полицијата во Дубровник потврдиле дека во инцидентот било оштетено едно возило, додека двајца државјани на Србија претрпеле телесни повреди. Засега не се соопштуваат дополнителни детали за мотивот на нападот или за идентитетот на напаѓачите.
Полицијата продолжува со истрагата и работи на утврдување на сите околности поврзани со инцидентот, како и на идентификување на лицата кои учествувале во нападот.
