Поради продолжениот сушен период и значителното намалување на нивото на реките, властите во Нови Пазар воведоа итни мерки за ограничување на ненаменското и нерационалното користење вода од градскиот водовод.
Градскиот совет ја донел одлуката со цел да се обезбеди стабилно и континуирано снабдување со вода за населението во услови на суша и намалени водни ресурси.
Со мерките се забранува користење вода од градскиот водовод за полевање градини, бавчи, тревници и други зелени површини. Забрането е и миење улици, тротоари, дворови, тераси и фасади.
Граѓаните нема да смеат да ги полнат или дополнуваат приватните базени со вода од водоводната мрежа, ниту да мијат автомобили и механизација. Исклучок се овластените автопералници.
Забрането е и секое друго непотребно или неконтролирано истекување вода од водоводната мрежа.
Спроведувањето на мерките ќе го контролираат инспекциските служби и комуналната полиција, а за оние што нема да ги почитуваат забраните се предвидени парични казни.
Од локалната самоуправа апелираат граѓаните рационално да ја користат водата и во овој период да ја употребуваат првенствено за основните животни и хигиенски потреби.
Мерките доаѓаат во период кога сушата и високите температури создаваат сè поголем притисок врз водните ресурси во регионот.
