Необична глетка во последните недели ги вознемири жителите на повеќе региони во Бугарија и Турција – голем број крупни скакулци се појавија во населени места, дворови и околу домовите, предизвикувајќи загриженост кај граѓаните.
Фотографии и видеа од инсектите почнаа да се шират на социјалните мрежи, а многумина се запрашаа дали станува збор за опасна појава или закана за земјоделството.
Сепак, експертите уверуваат дека нема причина за паника. Според надлежните служби, скакулците кои се појавиле припаѓаат на видот белочелен скакулец (Decticus albifrons), кој не претставува опасност ниту за луѓето ниту за земјоделските култури.
Појавата е забележана во повеќе бугарски области, меѓу кои Пазарџик, Пловдив, Благоевград, Софија и Сливен. Жителите сведочат дека инсектите најчесто се собираат околу улични светилки, осветлени згради, балкони и дворови, особено во вечерните часови.
За разлика од некои други видови скакулци кои можат да предизвикаат сериозни штети на посевите, овој вид има поинаква улога во природата. Тој се храни со помали инсекти и е дел од природниот екосистем.
Белочелниот скакулец е еден од најголемите претставници на дрвните скакулци во Јужна Европа. Возрасните примероци можат да достигнат должина од четири до пет сантиметри, што дополнително придонесува за впечатокот дека станува збор за „џиновски“ инсекти.
Експертите објаснуваат дека овие скакулци ја сакаат топлината и светлината, па затоа во летниот период често се појавуваат во близина на осветлени објекти.
Од Центарот за проценка на ризикот од синџирот на исхрана (CFRCA) посочуваат дека сезонската појава е природна и дека нема опасност од последици.
„Белочелните скакулци не се отровни, не напаѓаат луѓе, не пренесуваат болести и не се очекува да предизвикаат економски штети кај земјоделските култури“, велат експертите.
И турските власти реагираа по зголемениот број пријави за појава на скакулци во регионите околу Истанбул и Мраморното Море, но нагласија дека нема опасност за земјоделските насади.
Според стручните проценки, причината за зголеменото присуство на овие инсекти се високите летни температури и поволните услови за нивно размножување. Се очекува нивниот број природно да се намали во текот на август.
Иако необичната појава изгледа загрижувачки, експертите велат дека станува збор за природен летен феномен, а не за опасна инвазија.
