Четворица припадници на Интервентната полициска единица во Белград, заедно со менаџер на познат ресторан, се приведени по сомнежи за сериозни кривични дела поврзани со настани од 5 ноември 2025 година, соопшти Вишото јавно обвинителство во Белград.
Според истрагата, меѓу приведените се командантот на Интервентната единица 92 и неговиот заменик, како и двајца членови на истата единица. Тие се товарат за „трговија со влијание во соизвршителство“ и „злоупотреба на службена положба“, како и за непријавување кривично дело.
Обвинителството наведува дека осомничените не пријавиле сериозен криминален настан, со што, според нив, било оневозможено навремено процесуирање на случај поврзан со пукање во угостителски објект во Белград.
Во истиот случај е опфатен и Саша Вуковиќ, кој се наоѓа во притвор под сомнение за тешко убиство. Според информациите од истрагата, тој е поврзан со убиството на Александар Нешовиќ, познат како „Баја“, кој подоцна бил пронајден мртов, а неговото тело било скриено во буре во близина на Јарковачко Езеро.
Истрагата опфаќа и наводи дека по убиството биле преземани активности за прикривање на трагите и уништување на докази, при што дел од осомничените се товарат за помагање на сторител по извршено кривично дело.
Дополнително, приведен е и менаџерот на ресторанот „27“, кој се сомничи дека не пријавил кривично дело и помогнал во прикривање на настаните по неговото извршување.
Властите во Белград продолжуваат со истрагата, а обвинителството соопшти дека се собираат дополнителни докази и дека случајот останува отворен за понатамошно проширување.
