Луксузниот автомобил „Брабус“, во сопственост на српскиот јутјубер Baka Prase, изгорел рано утринава пред зградата во која живее, во елитната белградска населба Белград на вода.
Станува збор за ексклузивен модел на брендот Brabus, чија вредност се проценува на околу 500.000 евра. Автомобилот бил паркиран пред објектот кога избувнал пожарот, при што пламените јазици го зафатиле предниот дел од возилото. Според достапните информации, огнот брзо се проширил, предизвикувајќи значителна материјална штета.
Драматичната сцена ја забележал самиот јутјубер, кој од прозорецот на својот стан го снимил запаленото возило и видеото го објавил на социјалните мрежи. Во описот кратко напишал: „RIP BRABUS 2023–2026“, алудирајќи на периодот во кој автомобилот бил во негова сопственост.
Во моментов нема официјални информации за тоа како точно избувнал пожарот и дали станува збор за намерно палење или друг вид инцидент. Надлежните органи извршиле увид на местото и се спроведува истрага со цел да се утврдат причините и околностите под кои настанал пожарот.
Случајот предизвика големо внимание на социјалните мрежи, особено поради високата вредност на автомобилот и јавниот профил на неговиот сопственик, додека јавноста очекува повеќе детали од истрагата.
