Неколкумесечната интензивна истрага на полициските службеници на Министерството за внатрешни работи во Белград, во соработка со Вишото јавно обвинителство, резултираше со една од најзначајните заплени на нелегално оружје и експлозивни средства во последниот период. Акцијата била насочена кон сузбивање на најтешките форми на криминал, откривање на членови на криминални структури и пронаоѓање предмети поврзани со тешки кривични дела.
Од МВР соопштија дека со оваа операција е зададен силен удар врз криминалните мрежи и дека е спречена можната употреба на опасното оружје и експлозивни направи за извршување кривични дела против животот и телесниот интегритет.
Според официјалните информации, полицијата извршила претрес на стан, помошни простории и гаража во Нов Белград, при што бил откриен вистински арсенал, внимателно складиран и подготвен за употреба.
Што точно пронајде полицијата?
За време на обемната акција, запленети се:
- две модифицирани, импровизирани експлозивни направи со далечинско активирање и придружна опрема
- митралез
- снајперска пушка
- пет автоматски пушки
- три автоматски пиштоли, меѓу кои модели „heckler“, „uzi“ и „skorpia“
- два полуавтоматски пиштоли
- револвер
- противпешадиска мина со насочено дејство
- ловна пушка
- пет пригушувачи за автоматско оружје
- неколку стотици парчиња муниција од различен калибар
- два панцири со ознаки „Полиција“
- средства за врзување, меѓу кои лисици, ремени и футроли за огнено оружје
- импровизирана службена идентификација на МВР на Србија
- преносни радио-станици за комуникација
- повеќе маски за прикривање на идентитетот
Според истражните органи, најголниот дел од оружјето бил сместен во гаража во Нов Белград, која, како што се сомнева, била користена како магацин за нелегалниот арсенал.
Уапсен фитнес тренер
По наредба на Вишото јавно обвинителство во Белград, уапсен е А.А. (42) од Белград, по професија фитнес тренер, за кого се сомнева дека ја користел гаражата во која е пронајдено оружјето.
Од МВР информираат веднаш дека постојат основи на сомнение дека осомничениот сторил кривично дело недозволено производство, држење, носење и тргување со оружје и експлозивни материи. Тој е задржан до 48 часа, по што со кривична пријава ќе биде приведен пред надлежното обвинителство.
Поврзаност со експлозијата во Косовска улица
Според информации објавени во медиумите, експлозивните направи пронајдени во гаражата во Нов Белград се идентични со оние што претходно експлодираа во стан на улицата Косовска. Прелиминарните резултати од истрагата укажуваат на сериозна поврзаност меѓу двата случаи.
Во таа експлозија животот го загуби 21-годишниот македонски државјанин и модел Мартин Сипковски, а беа оштетени и околните станови. Според оперативни информации, тој наводно бил ангажиран за ликвидација на навивачкиот водач Тадија Пантиќ (23) од Земун, кој беше убиен еден месец подоцна.
Неофицијалните сознанија укажуваат дека експлозивот бил случајно активиран, додека лицето кое му го предало настраданиот веќе е уапсено по наредба на Вишото јавно обвинителство во Белград.
Истрагата продолжува, а надлежните служби најавуваат дополнителни детали за можните поврзаности, мрежи и улоги на вклучените лица во оваа сериозна криминална афера.
