Средбата меѓу украинскиот претседател Володимир Зеленски и српскиот претседател Александар Вучиќ предизвика бурни реакции во Приштина, медиумите и на социјалните мрежи. Најголемо внимание привлече повторната потврда од Зеленски дека Киев не ја признава независноста на Косово и дека ја третира оваа територија во рамките на Србија, при што Вучиќ беше наречен пријател.
Ваквиот став наиде на остри коментари и разочарување во дел од албанската јавност. На социјалните мрежи се појавија бројни негативни реакции, при што дел од корисниците потсетија на досегашната воена и хуманитарна помош што Косово и Албанија ѝ ја испратиле на Украина во текот на конфликтот. Дел од реториката содржеше повици за прекин на поддршката за Киев, како и остри и навредливи коментари од поединци.
Сепак, аналитичарите нагласуваат дека овие ставови доаѓаат од поединечни корисници на интернет и не претставуваат генерален став на целото општество. Овој дипломатски епизод повторно ги изнесе на површина сложените и чувствителни геополитички односи меѓу Украина, Србија и косовското прашање.
