Во голема и повеќечасовна спасувачка акција на околу 17 наутички милји јужно од островот Гавдос, грчката крајбрежна служба успеа да спасува околу 520 мигранти кои се наоѓале на рибарски брод. Акцијата вклучи два брода, меѓу кои и еден товарен брод под знамето на Бахамите, како и два авиони на Фронтекс и четири други бродови што беа во непосредна близина.
Спасените мигранти се пренесени на островот Крит, каде што во последните денови пристигнаа стотици други мигранти кои поаѓаат од либискиот брег. Местото се соочува со сериозен недостаток на капацитети за нивно сместување, што дополнително ја влошува ситуацијата.
Од почетокот на викендот, во близина на Крит и Гавдос се спасени проценети околу 2.000 мигранти, што ја става мигрантската криза во фокусот на внимание на грчките власти.
Темата за мигрантската криза се очекува да биде главна точка на дневен ред на средбата помеѓу грчкиот премиер Киријакос Мицотакис и министерот за миграција и азил, Танос Плеврис. Оваа средба беше закажана пред ситуацијата да ескалира, а доаѓа само неколку часа откако либиската Влада во Бенгази ги прогласи за непожелни еврокомесарот за миграција Магнус Брунер и министрите од Италија, Грција и Малта кои беа во посета на Либија.
По пристигнувањето на меѓународниот аеродром во Бенгази, тие добија наредба веднаш да ја напуштат либиската територија поради наводно кршење на дипломатските норми и меѓународни конвенции. Ова следеше по нивните претходни средби со владата на националното единство во Триполи и планираната средба со Калифа Хафтар во Бенгази.
Министерот Плеврис изјави дека „Крит е под огромен притисок од мигранти од Источниот брег“ и дека главната цел е да се спречи овој притисок да продолжи.
„Сакаме јасна порака – ќе ѝ помогнеме на Либија да ги задржи нелегалните мигранти, да го спречи нивното тргање кон Европската Унија и во исто време да се враќаат нелегалните мигранти во нивните земји. Во ова ќе соработуваме. Крит е под огромен притисок и сакаме да го запреме овој бран“, истакна Плеврис.
