Една објава на Инстаграм му донела сериозна парична казна на 20-годишен млад човек во Хрватска, откако фотографијата што ја споделил на својот профил била оценета како навредлива кон полицијата.
Станува збор за Н. Д., кого Општинскиот суд во Вараждин го прогласил за виновен поради објавата на социјалната мрежа.
На спорната фотографија, младиот човек бил фотографиран пред полициско возило, додека со двете раце покажувал средни прсти. Во објавата, покрај фотографијата, ја додал и песната „Хрватска полиција“ од групата Г7.
Токму комбинацијата од фотографијата и музиката била важна при оценката на судот. Според судското образложение, со таквата објава Н. Д. го омаловажил угледот на државен орган во момент кога полициските службеници ги извршуваат своите службени должности.
Судот оценил дека додавањето на песната дополнително го нагласило негативниот став кон полицијата и придонело објавата да биде сфатена како навредлива порака.
Случајот бил квалификуван како прекршок поврзан со нарушување на јавниот ред и мир, за што на 20-годишникот му била изречена парична казна од 600 евра.
Но, со тоа неговите финансиски обврски не завршиле.
Покрај самата казна, судот му наложил да плати и дополнителни 600 евра за судски трошоци.
Тоа значи дека вкупниот износ што треба да го плати достигнува 1.200 евра.
Пресудата била донесена без присуство на обвинетиот. Судот оценил дека постојат доволно докази врз основа на кои може да се донесе одлука и без негово присуство и изнесување одбрана на рочиштето.
Случајот привлече внимание поради тоа што станува збор за објава на социјална мрежа, која според судската проценка имала елементи на омаловажување на полицијата како државен орган.
Така, фотографијата која 20-годишникот ја објавил на својот Инстаграм профил на крајот го чинела 600 евра казна, плус уште 600 евра судски трошоци.
