Нови информации за убиството на поранешниот бугарски европратеник Слави Бинев, кој беше застрелан во својот дом во Софија, укажуваат дека зад злосторството можеби стои сериозен имотен спор поврзан со 500.000 евра.
Според пишувањата на бугарскиот весник „24 часа“, осомничениот Ејуп Темиз наводно му ја исплатил оваа сума на Бинев за да посредува во решавање спор околу вредни недвижности.
Имотниот конфликт бил поврзан со сопругата на Темиз, Нија, и архитектот Калин Тихолов, со кого нејзиниот починат татко имал заеднички деловни интереси.
Телефонскиот разговор што претходел на трагедијата
Според медиумската реконструкција, вечерта пред убиството Темиз бил на гости кај Бинев, каде што разговарале за имотниот спор.
Следното утро, Бинев наводно телефонски разговарал со Нија и ја обвинил дека поради нејзините постапки семејството ризикува да изгуби значителен имот.
Жената се расплакала, а нејзиниот сопруг, откако дознал за разговорот, заминал во домот на Бинев придружуван од двајца мажи.
Таму избувнала жестока расправија. Темиз се посомневал дека Бинев работи во интерес на спротивната страна во спорот.
Според објавените информации, Темиз најпрво го удрил Бинев во лицето, а потоа наводно пукал во неговата глава.
По инцидентот, тројцата мажи го напуштиле местото. Телото го пронашол домашниот помошник на Бинев, кој ја известил полицијата.
Осомничениот бил пресретнат на автопат
Со помош на безбедносните камери, полицијата ги идентификувала мажите и го пресретнала нивниот автомобил на автопатот „Тракија“.
Пиштолот, кој осомничениот наводно се обидел да го отфрли, бил пронајден и испратен на вештачење.
Ејуп Темиз е обвинет за убиството и задржан до 72 часа, додека другите двајца мажи се третираат како сведоци.
Бугарските власти засега не ја потврдиле целосната медиумска реконструкција на настанот, но посочиле дека случајот е поврзан со финансиски спор.
