Полицијата во Белград уапси повеќе лица осомничени за киднапирање на турски и авганистански државјани. Жртвите се спасени.
Во ефикасна полициска акција спроведена денеска на територијата на Белград, полицијата по налог на Вишото јавно обвинителство уапсила повеќе лица осомничени за киднапирање на три турски и двајца авганистански државјани.
Меѓу уапсените се С.П., К.К. и државјанинот на Босна и Херцеговина С.Д., кои се сомничат за кривично дело киднапирање.
Жртвите на киднапирањето, турски и авганистански државјани, биле пронајдени и ослободени од рацете на осомничените.
Тие ќе бидат испрашани од надлежниот јавен обвинител и ќе дадат исказ за сите околности и за тоа низ што поминале за време на киднапирањето.
Истрагата продолжува, а надлежните органи работат на утврдување на сите околности поврзани со случајот.
