Две државјанки на Македонија се уапсени во Црна Гора под сомнение дека извршиле кражба на златен накит од златарница во Игало. Според информациите од црногорската полиција, по брзата интервенција на службениците, украдениот накит е пронајден и вратен на сопственичката.
Од црногорската полиција соопштија дека службениците од Одделението за безбедност Херцег Нови ги лишиле од слобода Ж.Ц.Т. (55) и А.Р. (33), двете од Скопје и државјанки на Македонија, поради сомнение дека го сториле кривичното дело кражба.
Според првичните информации, двете жени се сомничат дека од златарница во Игало одзеле четири златни ланчиња. По преземените полициски активности, украдениот накит бил пронајден и вратен на сопственичката на златарницата.
Надлежните органи во Црна Гора информираат дека против двете осомничени ќе биде поведена соодветна кривична постапка во согласност со црногорското законодавство.
Истрагата продолжува, а полицијата работи на целосно расчистување на сите околности поврзани со случајот.
