Минатата година, албанскиот пазар на трудот покажал дека повеќето слободни работни позиции се ориентирани кон основни квалификации, објави економското списание „Монитор“. Националната агенција за вработување на Албанија објавила вкупно 61.624 слободни работни места во периодот јануари-декември 2024 година, што е за еден процент повеќе од претходната година. Сепак, над 80 проценти од овие работни места барале само основно образование.
Најголема побарувачка имало за професии како продавачи во продавници, хигиеничарки, производствени работници, келнери, помошници во градежната или преработувачката индустрија. Работата во овие сектори е често физичка, со релативно ниски плати и бара голема флексибилност и издржливост.
Структурата на албанскиот пазар на трудот покажува дека повеќето работни позиции се концентрирани во сектори со ниска продуктивност и физичка работа. Позиции што бараат високо образование или специјализирани вештини, како менаџери, техничари или стручњаци, сочинуваат значително помал процент од вкупните слободни работни места.
Според податоците на „Монитор“, најмногу работни места минатата година биле објавени во преработувачката индустрија (28,6%), следуваат хотели и ресторани (17,8%), трговија на големо и мало и поправка на моторни возила (15,2%), други услуги (12,5%) и градежништво (9,4%).
Анализата на меѓународните финансиски институции покажува дека во последните две децении Албанија создала помалку работни места за квалификувани работници во споредба со другите земји во Југоисточна Европа. Иако вработеноста се зголемила, растот главно им користел на лицата со основни вештини, додека образованите луѓе се соочиле со ограничени можности за работа.
Списанието ја сумира ситуацијата со заклучок дека за над 80 проценти од слободните работни места во 2024 година, високо образование или специјализирани вештини едноставно не се барале.
