Долги векови вулканот Метана, сместен во близина на Атина, се сметаше за мирен и згаснат. Последната ерупција е забележана уште во 250 година пред новата ера, а античкиот историчар Страбон ја документирал како редок настан. Но нова студија објавена во „Science Advances“ открива дека оваа тишина е само привид.
Истражувачки тим предводен од Разван-Габриел Попа од ЕТХ Цирих ја реконструирал историјата на вулканот во последните 700.000 години и идентификувал најмалку 31 ерупција. Најшокантен е периодот од речиси 100.000 години без површинска активност – од 280.000 до 168.000 години – кога вулканот изгледал како да е згаснат.
Сепак, геолошките записи откриваат дека под површината Метана тивко акумулирал магма, подготвувајќи се за нова ерупција. Ова откритие ја руши долгогодишната дефиниција во вулканологијата, според која 10.000 години неактивност се доволни за вулкан да се смета за згаснат.
Научниците предупредуваат дека ваквите „тивки“ вулкани претставуваат сериозен ризик, бидејќи нивната мирна надворешност може да доведе до погрешна проценка на опасноста. Метана е пример дека вулканите не престануваат да живеат – тие само чекаат момент да ја ослободат својата сила.
