Грчката Служба за национална безбедност започна детална истрага за масовното купување земјиште и недвижности од страна на бугарски и турски државјани во Северна Грција, објави Бугарското национално радио, повикувајќи се на извори од локалните медиуми и безбедносните структури.
Според достапните информации, странски државјани во последниот период интензивно купуваат имоти во регионот, што кај грчките власти предизвикало сериозна загриженост. Особено се издвојува интересот на бугарските граѓани, кои најчесто купуваат напуштени куќи во депопулирани села по исклучително ниски цени. Овие објекти потоа се реновираат, а купувачите имаат намера трајно да се населат во тие средини.
Покрај индивидуалните купувања, регистрирани се и случаи каде бугарски државјани стекнале објекти што служат како центри за нивни сонародници, но и за турски граѓани. Ова дополнително ја засилило загриженоста кај грчките политички и безбедносни кругови.
Пратеници од владејачката партија Нова демократија веќе доставиле официјално писмо до грчкиот парламент, во кое бараат итни измени на законската рамка што ги регулира правата на странски државјани за поседување имот во земјата, особено во чувствителните погранични региони.
Во фокусот на истрагата се и турските државјани, за кои се тврди дека користат правни „дупки“ за да ги заобиколат ограничувањата што важат за државјани на трети земји. Според наводите, тие инвестираат преку бугарски компании во кои формално се ко-сопственици, со што легално купуваат имоти на грчка територија.
Адвокати и нотари од регионот на Александрополис потврдуваат дека турските инвеститори вложуваат значителни финансиски средства и веќе поседуваат хотели, деловни објекти и луксузни недвижности. Тие истакнуваат дека од формално-правен аспект, европското законодавство се почитува.
Сепак, грчките безбедносни служби се сомневаат дека зголемениот интерес на турските инвеститори за регионот Еврос не е само економски мотивиран, туку може да има и долгорочна стратегиска цел – постепено стекнување влијание и контрола во чувствителна погранична област.
Паралелно со тоа, се проверува и потеклото на средствата со кои се финансираат овие купувања. Според дел од информациите, постојат сомнежи дека дел од капиталот доаѓа од сивата економија, вклучително и од нелегални активности како трговија со оружје и дрога, што дополнително ја усложнува ситуацијата и ја зголемува сериозноста на истрагата.
