Претседателот на Србија, Александар Вучиќ, денеска ѝ се обрати на Дијана Хрка, мајката на настраданиот младич во трагедијата во Нови Сад, која веќе седум дена штрајкува со глад пред Народното собрание. Вучиќ истакна дека е подготвен да разговара со неа во секое време, но нагласи дека средбата треба да се одвива без политичка претстава и присуство на голема публика.
„Јас сум претседател на сите граѓани и морам да ги поднесам и најтешките можни навреди и најлошите невистини, но секогаш морам да бидам подготвен да разговарам“, рече Вучиќ, истакнувајќи дека ја разбира болката на Дијана и сериозноста на нејзината загуба.
Тој ја замоли мајката да го прекине штрајкот со глад, предупредувајќи дека „никој не смее да си игра со сопственото здравје“. „Немам ништо лично против госпоѓата Дијана Хрка. Подготвен сум да разговарам, да ја сослушам и да помогнам ако можам. Ако сака да дојде во Претседателството, ќе ја примам независно од распоредот“, додаде Вучиќ.
Претседателот потврди дека го посетил семејството Фириќ во Нови Сад, мајката која ги загуби ќерките Сара и Валентина во падот на настрешницата на железничката станица. Вучиќ нагласи дека при таа посета не понел камери, а посетата не била снимена ни со телефон, и дека информациите за неа протекоа во јавноста преку групите кои организираат блокади.
„Мојата совест е чиста, затоа што ја водев земјата во тешки моменти и ја зачував стабилноста повеќе од 14 години“, заклучи претседателот.
