Во северниот дел на Австрија се случил сериозен инцидент во кој пет деца на возраст од 10 до 14 години биле повредени откако се активирала неексплодирана воена муниција од Втората светска војна, додека тие биле на логорски оган. Информацијата ја потврди австриската полиција, која веднаш започнала истрага.
Според првичните податоци, децата пристигнале од друго населено место во истата покраина Горна Австрија и престојувале во камп на отворено во населбата Санкт Освалд кај Фрајштад. Токму таму дошло до ненадејна експлозија која ги повредила малолетниците, но засега не се објавени детали за тежината на нивните повреди.
Полицијата информира дека по инцидентот бил извршен детален увид на теренот, при што во близина било откриено уште едно експлозивно средство. И тоа било идентификувано како остаток од воена муниција што не експлодирала од периодот на Втората светска војна.
Поради новооткриената опасност, на местото била повикана специјализирана единица за деактивирање на бомби, која ја презела контролата врз ситуацијата и го обезбедила теренот за да се спречат дополнителни ризици.
Истрагата е во тек и треба да утврди на кој начин ова опасно воено оружје завршило токму во подрачјето каде што децата кампувале и палеле оган. Австриските власти нагласуваат дека иако во земјата повремено се пронаоѓаат остатоци од војната, најчесто при градежни работи, вакви случаи во кои тие се активираат во близина на луѓе се исклучително ретки.
