Вкупно 18 лица се приведени во Пловдив поради сомнение дека се поврзани со меѓународната неонацистичка организација „Крв и чест“, соопшти директорот на Обласната дирекција на бугарското Министерство за внатрешни работи во Пловдив, постар комесар Васил Костадинов.
Приведувањето било извршено во приватен клуб кој се наоѓа спроти Младинскиот рид, каде полицијата пронашла различни предмети со неонацистичка содржина. Случајот е предаден на надлежните органи за понатамошно постапување.
Според бугарските власти, уапсените се осомничени за дело предвидено со член 162, став 1 од Кривичниот законик, кој се однесува на пропагирање дискриминација, насилство или омраза врз основа на раса, националност или етничка припадност.
Меѓу приведените има и лица кои претходно биле евидентирани од полицијата, а некои од нив имаат и пресуди за различни кривични дела.
Особено внимание предизвикува информацијата дека меѓу 18-мината е и полнолетниот млад човек кој неодамна беше поврзан со случајот со напад врз непалски државјани. Со него биле приведени и неговиот татко и брат. Младиот човек бил пуштен од притвор само четири дена пред новото приведување.
Во полициската акција биле приведени и три девојки, од кои едната е на возраст од 17 години и во септември треба да наполни 18 години.
Во клубот се собирале речиси две години
Според Костадинов, објектот не функционирал постојано како класичен угостителски објект, туку во него група луѓе периодично се собирала во последните околу две години.
Во моментот на полициската интервенција, присутните го следеле фудбалскиот натпревар меѓу „Лудогорец“ и „Ботев“ од Пловдив. Закупецот на просторот, исто така, се наоѓа меѓу приведените лица.
До групата истражителите дошле преку заедничка работа со Државната агенција за национална безбедност (ДАНС).
Сите 18 лица биле задржани во полициска станица во времетраење до 24 часа. Бугарските власти најавија дека дел од нив ќе бидат ослободени, додека истрагата продолжува.
Во тек се и дополнителни процесни дејствија на други локации, а надлежните органи продолжуваат да ги утврдуваат сите околности поврзани со активностите на групата.
